【Now財經台】英國《金融時報》日前引述消息報道，滙豐控股(00005)英國財富管理業務擬大裁員，管理層及專業職位「腰斬」，以及炒70%財務顧問。報道又指，呢輪裁員行動係集團推進利用人工智能(AI)服務理財客戶其中一步，雖然消息仍未證實，但市傳嘅裁員規模好大，點睇喺AI大時代之下，企業嘅裁員趨勢？
易方資本人工智能應用總監王遨研認為，AI發展引發嘅裁員潮一定會愈燒愈大，但對於滙控先向財管部門「開刀」感到驚訝，因為財務及稅務建議可以用AI取代，但投資者都需要真人服務。
佢又話，長遠而言，滙控呢類大企業人手多，會令營運效率偏低，事實上，AI使用一定會不斷蔓延，例如摩根大通、高盛及摩根士丹利等都有裁員行動，目的係削減營運成本，加上早前呢啲投行都有參與英偉達(Nvidia)嘅融資，原因可能係認為用AI比起使用傳統人手，成本會更低。
