【Now財經台】國產大模型孖寶MiniMax(00100)及智譜(02513)，今日(8日)臨近中午收市前，急瀉跌近14%及9%，可能同外圍一單消息有關，就係同業美國嘅Anthropic推出「Claude Haiku 5.5」，成本比上一代嘅4.5大降75%，Claude Haiku 5.5係公司歷來最平、最快及性能最強嘅小模型，程式設計、知識工作能力都顯著提升。之前OpenAI嘅「GPT-6 Astra」都話劈價50%，美國先進模型排隊劈價，係咪代表競爭進一步白熱化？
元宇證券證監會持牌人士李偉傑指，國產大模型係開源與閉源並行，美國先進模型大部分係閉源，加速智能而言，開源或更好，但由於開源係開放予公眾作參數參考，變相更易被其他地方吸收到，加上，Claude Haiku 5.5劈價對市場嚟講確實係一個震撼彈，跟內地活躍大模型相比，屬於偏低定價，優勢相當吸引。
Jason又話，短線嚟講，內地人工智能(AI)模型一定會受影響，對其他AI算力、硬件股亦會有曲線影響，大幅減價會進一步加深市場對AI算力投放嘅憂慮，加上內地AI模型企業發展要面對咁強勁嘅對手，所以，今日港股相關板塊明顯受壓。
