【Now財經台】內地十一國慶長假期明日(8日)就結束，北水就會「回歸」，今年「十一黃金周」消費情況如何？股市會點反映假期前內地推出嘅新招？
勝利證券首席顧問陳建良認為，今年消費情況差過預期，以汽車銷售為例，一般嚟講，相比農曆新年，黃金周有更多人買車，但睇返內地車企銷售，除咗小米集團(01810)外，其他車企銷售按年都要跌，可能市場對大額消費仍然審慎，所以車股都唔係好升。
內房方面，KL就話，內地喺長假前推出房貸貼息新招，令一、二線城市睇樓人數上升，反映市場認為政策改變，變成心理作用大於實際，只要有需求就可以買。對於最近出現「日光盤」情況，即一開賣就沽清，KL認為，內地只係學咗香港嘅模式，即推盤數量少及提供優惠，所以好快就賣晒。
至於二手成交反映更多投資者有意入市，但實際上樓市係咪轉勢仍言之尚早，不過，最少市場已對樓市冇咁悲觀。
