【Now財經台】環球債息高企情況愈來愈嚴重，由美國蔓延至全球，最新法國10年期債息衝上24年高位，即升至歐債危機以嚟最高水平，如果睇埋法國及德國息差，相比當年部分歐豬五國(PIIGS)，包括葡萄牙、意大利等國家，現時息差更闊，情況發展落去會唔會變成歐債危機2.0？
資深經濟分析師羅家聰指，英美法都有財赤問題，亦因為債務危機被唱衰過，呢啲係大型先進經濟體日積月累嘅通病，唔係結構性問題。雖然法國近期面臨通脹、人民不滿政策而遊行示威等問題，但唔足以構成系統性危機，目前，法國除咗10年期債息，其他經濟指標都未見異常。
回顧PIIGS出事前，債息倒掛得好犀利，短息抽咗上去，信用違約掉期(CDS)急升，不過，依家任何貨幣市場指標及短息都冇事，加上債息扯高唔係法國獨有，德國、日本、美國債息都升緊，只係法國升得急啲，加上歐債危機爆發時，債息其實跌緊，依家債息向上，令息差表面睇嚟擴闊咗。
