【Now財經台】美國聯儲局兩名副主席傑斐遜(Philip Jefferson)、鮑曼(Michelle Bowman)，以及紐約聯儲銀行行長威廉斯(John Williams)都提及，局方或需更多時間決定下一步行動，暗示10月唔會加息。不過，美匯指數突破102，升上逾1年高位，幾名官員嘅言論係咪唔止反映10月情況，而係更長遠嘅趨勢？
信誠證券及期貨投資服務部董事蕭猷華指，美匯指數升穿102涉及好多因素，包括霍爾木茲海峽(Strait of Hormuz)嘅情況。美國總統特朗普(Donald Trump)昨日(1日)增派船艦去中東，有可能喺美國中期選舉後再向伊朗發動攻擊，導致油價溢價風險相當高，刺激美元上升。
Tony續指，聯儲局官員言論偏鴿令債息喺高位調整，但相信都係因應數據作出利率走勢嘅客觀判斷。佢又話，現時通脹未見回落，就業市場強勁，美國個人消費開支(PCE)物價指數又大升，反映消費仍有增長。不過，由於債息持續高企，估計聯儲局年內仍會再加息。
