【Now財經台】印刷電路板(PCB)產品製造商景旺電子(03228)今日(21日)開始招股，集團採用冇回撥機制，發行7294萬股H股，當中10%公開發售，餘下90%就國際發售，意味散戶部分只有729萬股，而14名基石投資者將合共認購3478萬股，佔整體發售股數47%。景旺電子招股價上限69.88元，以上周五(18日)A股收市價計，H股較A股有約43%折讓，H股定價吸唔吸引？
元宇證券基金經理莫灝楠指，景旺電子H股定價吸引，較A股有約43%折讓，而A股股價又升緊。估值方面，預測市盈率(PE)約50倍，雖對PCB公司來講唔算平，但因為股份有人工智能(AI)概念，加上喺A股同類股份唔多，所以投資者一見到PCB股就蜂擁而至，令唔少PCB公司估值高企，所以H股價格對北水有較大吸引力。
Casper又指，優惠力度大令有貨嘅基石或較大額投資者，有較大誘因繼續坐貨。此外，依家PCB供應非常緊張，好多基石投資者包括中際旭創(03308)等，為上游或下游合作方或客戶，由於佢哋需要同公司建立關係以獲得供應，所以呢D公司唔會咁容易沽貨，如果咁多投資者都唔沽，會對股價有利好作用。
