【Now財經台】《彭博》綜合環球主要國債平均孳息率指數，升至2008年金融海嘯前高位，美國、日本、德國長債價格相繼失守低位。雖然美國財政部即將公布回購國債規模，但市場認為，除非金額遠超預期或11月新季度持續做，否則作用有限，環球長債息高企係咪暫時解決唔到？呢個情況同超大型人工智能(AI)企業發債又有冇關係？
「股市漁夫」創辦人莊志雄指，環球通脹問題由2020年開始一路向上，如果央行想根治通脹，加息幅度必須高過通脹率1%至2%，但依家各央行都冇呢個決心，純粹靠回購操作等，力度應該唔夠，必須由聯儲局出手，做量化寬鬆(QE)或扭曲操作(Operation Twist)，加上美國總統特朗普(Donald Trump)傾向減息，估計聯儲局主席沃什(Kevin Warsh)都唔會逆佢意，財政部只可以將長債息喺5.3厘水平封頂，力保唔會失守5.5厘，但要跌落5厘以下就好難。
Lewis又話，6月底SpaceX發行250億美元長債後，各大科技巨企都開始加碼，美國30年期孳息率由4.8厘水平飆至5.3厘，依家巨量AI相關債務發行，規模相當於美國每年發債總量70%，呢啲優質債變相係同美國國債爭緊生意，從而出現供求問題。
佢續指，有分析指，大量發債會推高美債約0.3個百分點，例如Google母公司Alphabet發30年期債，孳息率接近6.4厘，遠遠高過美國債券，自然好多投資者都會選擇佢，令整體債券長期融資成本全面提高。
