【Now財經台】據TrendForce數據顯示，一條16GB第5代雙倍資料率同步動態隨機存取記憶體(DDR5)，由去年9月不足10美元飆升至現時逾50美元，但升幅由早前嘅3倍大幅放緩至最新25%，呢種「價量齊升」嘅情況仲可以維持幾耐？相關股份仲值唔值得買入？
易方資本投資組合經理王逸研指，雖然價格升幅放緩，但今個周期同以往有啲唔同，過往動態隨機存取記憶體(DRAM)周期短及激烈，價格短期衝高後，工廠就會快速增加產能，然後周期好快就結束，但依家有英偉達(Nvidia)及Google等，領先原廠推動高頻寬記憶體(HBM)進展，HBM做得愈多，對DDR供應就壓得愈嚴重，所以價格未必會升得咁多，但相信企業方面報價會維持堅挺，在需求增加下，令產出及價格可持續高企，又指對2027年及2028年展望偏向樂觀。
王逸研又話，雖然市場對記憶體公司睇法比較保守，例如擔心內地長鑫科技等擴產會導致供過於求，不過，無論內地還是全球原廠，都面對晶圓設備短缺等物理限制，所以呢個記憶體周期仍會持續，相關股份仍值得買入。
