【Now財經台】華虹宏力(01347)及濰柴動力(02338)喺港股明日(4日)收市後，就會正式「染藍」，自恒指公司8月下旬公布季檢結果後，兩隻股份嘅股價都表現一般，係咪「染藍」刺激作用愈來愈細？
艾德金融執行董事陳政深指，「染藍」效應的確愈來愈細，恒指成分股數目愈來愈多，已增至95隻，嚟緊甚至有機會去到100隻，而呢兩隻股份嘅佔比相對細，華虹佔0.54%，濰柴佔0.37%，雖然都會有啲被動盤，但佔比太細唔會郁到個股價，所以唔好單純因預視到被動資金會入市，都要有基本因素或估值因素先可以推升到股價。
Ryan又話，「染藍」對華虹基本因素冇影響，始終市場定位係較成熟嘅製程，內地供應鏈唔係全部都係頂尖科技，有啲一般應用嘅供應鏈都全面本土化，加埋新能源車嘅工業需求支持，可以話「爛船都有三斤釘」，製程方面，全球競爭激烈，市場考量就會睇估值有冇說服力，雖然華虹股價由高位回調唔少，但估計短線仍沉多浸。
