【Now財經台】美團(03690)今日(28日)放榜，股價喺業績前反覆向上，一度下試7月中成交密集區，即76元水平，最新上返78元樓上，升不足1%。市場預期，美團上季業績會較第1季有改善，今朝好淡倉資金都好活躍，CALL輪嘅窩係咪相對低？想喺業績前做短線睇好部署，應該揀咩產品？
法興證券上市產品銷售部董事蔡秀虹表示，由於美團之前幾日跌幅顯著，導致引伸波幅顯著上升，吸引唔少資金開好倉。牛證方面，如果揀得貼價啲，槓桿效應會較高，但要考慮股價波動性，因為收回風險相對大。
佢續指，CALL輪就要考慮引伸波幅，業績前都會硬淨啲，但都要考慮放榜後會唔會回落，所以建議揀返貼價少少嘅產品，唔好揀太短身嘅條款，例如行使價94元至95元，價外20%嘅CALL輪，年底至明年第1季到期，屬於中長身條款，時間值損耗相對溫和，係具防守性嘅選擇。
