【Now財經台】截至早上11時止，1小時內《彭博》搜尋量最多港股，依次為江西銅業(00358)、信達生物(01801)、紫金礦業(02899)、小米集團(01810)及藥明生物(02269)。
信達生物今日(26日)走勢相當凌厲，一度升逾12%，創新高見112.7元，但其後升幅略為收窄，集團昨日(25日)出咗業績，中期多賺50%，產品組合增至20款上市產品，期內，總收入逾86億人幣，其中，授權費收入近3.1億人仔，按年減少53%，高盛指，授權費收入差過預期，但仍上調目標價至120.6元。雖然業績有挑剔位，但其實股價過去一段時間都持續向上，前景係咪真係咁理想？
資深證券分析師彭偉新表示，信達生物純利增幅超預期，但毛利比較波動，毛利率按年微跌1%至85%，但市場主要睇毛利率而唔係毛利增幅，因為毛利率係反映定價權、客戶分成等，會有一定預視性，如果毛利率持續下跌，公司情況就唔太理想。
佢又話，另一重點係研發開支，當集團要開發更多藥品，研發開支一定會增加，會壓低即時收益增長，所以，信達生物要喺研發與收益之間取得更好平衡，又認為股價曾創新高，相信已到咗唔少投資者嘅食糊位。
