【Now財經台】華虹宏力(01347)成功「染藍」後，股價似乎應驗咗「染藍魔咒」，繼昨日(24日)收市挫逾5%，跌至3個月低位後，今朝(25日)再低開0.7%，其後一度低見105.5元，跌3%。好倉昨日有逾200萬元資金流入，如果想入場博反彈，熱門牛證槓桿約10倍，但就較貼價，收回價約101元至104元，風險高唔高？
胤源世創家族辦公室(香港)第一副總裁黃偉豪指，牛證收回價比較貼，同現價差距唔係太大，有一定收回機會，但華虹股價由近幾個月高位219元跌落嚟，近期最低見過105元，其實都跌50%，跌到呢啲位有機會喘定，未必會再大跌，所以呢啲熱門牛證唔係完全唔值博，揀呢批牛證可以用下個支持位250天線做止蝕位，一旦跌穿就離場，唔穿就博反彈，第一浸反彈目標可以睇120元。
