【Now財經台】除咗美國30年期國債孳息升至近20年高位，即5.3厘水平，10年期債息亦升至4.7厘水平，雖然依家暫時未見對美股有太大影響，但如果債息持續扯高，危險係咪會逐步浮現？
資深經濟分析師羅家聰指，美國10年期債息幾年前已經見過5厘，當時的確引發唔少恐慌，美股調整咗幾個月，不過，依家關鍵係長債息水平同整體經濟增長水平相差幾多，原因係「債主」要避險，股市就係冒險，資金會唔會回流股市，就要睇股息率相對避險長債息高幾多。
KC續指，當10年期債息處於5厘水平，整體經濟收益又係約5厘，兩者就大致平衡，不過，如果債息再升就會失衡。此外，如果避險息率相對股息率僅高出1厘至2厘，股債之間嘅套戥就較易發生，相對於避險，資金就傾向流入股市。
