【Now財經台】本港樓價喺高位整固，今年首7個月，樓價介乎1000萬至5000萬元嘅中高價樓，無論一手或二手，登記量已佔去年約90%，由以往細價樓主導，變成現在以中高價樓為主，點解會出現呢個轉變？
中原地產研究部高級聯席董事楊明儀指，樓價由2010年開始持續上升，當時政府「加辣」及收緊按揭，樓價1000萬元以上，只造到50%按揭，發展商為咗就返個價造按揭，所以起咗好多細單位，去到2021年樓價跌，積存咗唔少呢啲細單位，為咗去庫存，近幾年都不斷減價。
佢又話，喺2025年《財政預算案》將100蚊嘅印花稅，延伸至樓價400萬元以下單位都可以受惠，2025年中樓價開始見底回升，H按息跌穿封頂後，加埋減息，以前一直按兵不動嘅換樓客，由於之前上會難做高成數，沽貨又難，但依家放寬至所有物業都造到70%按揭，換樓客就蠢蠢欲動，而投資者亦出返嚟，因為租金一直升，亦見到樓價跌到有一定水位，都出返嚟「尋寶」。
