【Now財經台】國泰航空(00293)今日(5日)中午出咗業績，股價午後顯著抽升，一度升逾3%，高見14.88元。集團中期多賺近71%，燃油對沖轉賺逾8.7億元。國泰又計劃投資約1500億元，未來10年目標引入150架新飛機，並將網絡擴至150個航點。地緣政治因素似乎冇乜影響國泰業績？股價仲有幾多上望空間？
元宇證券基金投資總監林嘉麒認為，國泰股價仍有動力，現時走勢比之前發盈喜時更好，燃油對冲起到作用，雖然中東航線受地緣政治影響，但亞太區嘅短途航線幫到業績，所以整體冇太大影響。
股價方面，KK話，7月底已呈上升趨勢，反映業績好過市場預期，雖然下半年主調冇特別變化，但市場見到集團上半年表現好，估值自然會升，又認為國泰股價短期仍有上升空間。
佢續指，如果國泰喺第3季嘅傳統淡季都做到成績，相信市場會願意畀更多溢價。
