【Now財經台】中芯國際(00981)股價昨日(4日)反彈近5%，好倉有376萬元資金離場，中芯股價今朝(5日)繼續升，高開1%後，一度高見68.7元，升5.2%，今朝好友傾向食糊還是繼續坐貨？部署CALL輪定牛證較多，應該點擺位？
摩根大通亞洲上市衍生產品銷售部執行董事李錦妍指，過去5日，中芯單頭輪坐貨資金仍然係最多，但正股今日連續第2日反彈，更升穿68元，見到部分好友繼續食糊離場。
Carol又指，至於CALL或牛證點揀，睇返過去5個交易日，投資者較多用CALL做部署，可能因晶片股單日波幅較大，貼價牛熊證收回風險較高，加上槓桿同活躍嘅CALL條款差唔多，如果現階段入場博上返70元樓上，可以揀價外約20%嘅CALL。
