【Now財經台】信義光能(00968)日前出咗業績，雖然半年少賺近95%，中期息又大減逾94%，但股價今日(3日)高開逾1.8%後，升幅一度擴大至逾13%，高見2.495元，睇返公司之前嘅盈警，預期喺最劣情況下可能要蝕5000萬人仔，但最終賺3900萬人仔，係咪因為咁所以股價今日大升？
高歌證券金融首席分析師聶振邦指，信光股價升係可以理解，之前發咗盈警股價都冇出現大調整，盈警指出，最壞情況下會「見紅」，但最後有錢賺，對市場嚟講算係一個驚喜。
聶Sir又話，信光股價之前調整得比較深，去年11月由4.1元「腰斬」至1.9元，之後先開始回升，依家市場對集團前景有憧憬，所以股價今日(3日)升得高啲。
