【Now財經台】7月有17隻新股上市，總集資額逾600億元，主要係有巨無霸中際旭創(03308)上市，集團係本港7年以來最大型新股，昨日(30日)首掛輕微「潛水」，今日(31日)上市第2日就發力，一度飆近23%，高見1178元，之後升幅收窄，但仍企穩1000元水平，係咪同今日全球人工智能(AI)相關股反彈有關？點睇後市表現？
Blue Water Capital投資總監李澤銘指，中際旭創之後表現好難估計，今日中際旭創A股略為反彈，不過，中際旭創喺香港招股時，H股定價較A股有24%折讓，公布定價後，中際旭創A股持續跟外圍跌。
Alan續指，昨晚AI上游相關股倉位出現空倉回補情況，雖然相關板塊有反彈潛力，但係反彈波幅約相當於跌幅約30%，反映上升空間有限，佢估計，相對於A股，中際旭創H股上升空間有限，因此，短期可能係一個離場好時機。
