【Now財經台】國產光刻機有望今年交付到中芯國際(00981)、華虹宏力(01347)手上，消息一出，結果震散全球人工智能(AI)硬件股，尤其光刻機相關產業鏈，係咪憧憬繼國產DUV後，下一步就係現時最先進嘅EUV技術？
元宇證券大中華區股票投資總監趙晞文估計，會係幾年後嘅事，尤其EUV係全球光刻機最頂尖技術，前端設備入面，其實只有ASML做到，門檻太高之餘，亦因為作價非常昂貴，但其實對於下游嘅代工企業，例如台積電(TSMC)、英特爾(Intel)，甚至三星電子(Samsung Electronics)對EUV嘅需求都唔大，呢啲公司會透過優化自身工藝，提升產能、量率，而未必用到EUV。
佢又話，投資者唔使太擔心，其實去年9月都曾經傳出呢個消息，但當時市場反應好正面，所以今日呢個消息唔係震散全球科技股嘅「元兇」，反而係全球科技股去槓桿先至係「幕後推手」。
