【Now財經台】南韓股市近期高低波幅非常誇張，短短1個月由約9000點落到約6000點，韓股兩大重磅股三星電子(Samsung Electronics)及SK海力士(SK Hynix)之前狂飆，導致之後個股槓桿ETF失控，觸發一波去槓桿，引發南韓政府收緊監管，到底記憶體行業周期見頂未？
資深經濟分析師羅家聰認為，記憶體行業周期已見頂，一般都係3至4年一個周期，因為半導體相關指數已多次大跌逾20%至30%，甚至更多。不過，結構方面呈上升趨勢，雖然半導體行業持續波動，但整體都係呈向上趨勢。
KC續指，睇返今個周期，費城半導體指數(SOX)升得太急，由第2季起步，以倍數計咁急升，單季咁夾上去嘅情況係唔可以持續，加上南韓晶片技術同英偉達(Nvidia)等比較唔算太先進，而二、三線晶片市場供不應求情況只係階段性，加上技術唔係最先進，但價錢又偏貴，由於會有其他供應者加入，要供應穩定其實唔難，而晶片價格太貴會導致中端市場需求大減。
