【Now財經台】恒生指數自6月底低位22518點，彈咗逾11%，最新企喺25000點樓上，比較同期恒生高息股(03466)，呢隻高息股交易所買賣基金(ETF)遲大市幾日見底，至今都彈咗約10%，原因係有啲持倉股嘅股價回升，係咪反映資金開始流入有避險功能嘅高息股？
獨立市場策略師何啟聰指，高息股喺6月跌咗太多，當時市場預期美國聯儲局今年會加息2至3次，但由於油價回落時，消費物價指數(CPI)及生產物價指數(PPI)又會跟住回落，所以就算最近油價升返，市場對今年加息嘅預期，仲未去返6月時嘅狀況。
Ivan續指，過往市場擔心內企業績及經濟數據轉差，但隨著內地6月經濟數據出爐，市場亦鬆一口氣，所以整體高息股都有反彈，不過，面對外圍咁多不明朗因素，Ivan建議投資者集中留意幾類高息股較好，例如石油股、國際金融股等。
