【Now財經台】今年上半年，樓價2000萬元以上嘅豪宅，有逾2300宗合約登記，較去年下半年升25%，涉資逾千億元，係1995年下半年有紀錄以來，創31年嘅半年度歷史新高。本港樓市上半年熾熱，高價樓盤特別受追棒，單計上半年，金額已超越2021年上半年高位，今年市況同2021年有咩唔同？
中原地產研究部高級聯席董事楊明儀表示，2021及2026年上半年，一二手豪宅均錄得逾千宗2000萬元以上成交，2026年一手成交升幅較顯著，金額較2021年高位多20%，成交宗數就升10%。
她續指，2021年嘅豪宅成交，金額以2000萬至3000萬元為主，但2026年就以3000萬至5000萬元，甚至5000萬元以上為主，相信係因為2021年處於樓價高峰期，呎價非常高，唔係太多買家可以負擔到，所以就選擇相對低價嘅豪宅，但政府「撤辣」後，樓市喺2025下半年開始回穩，由於出現回調令樓價低咗，令中高價物業需求上升，買家可以用相同價錢買到更大嘅單位，吸引買家出嚟尋寶，促使今年成交總額創新高。
