【Now財經台】百勝中國(09987)斥12億美元收購必勝客(Pizza Hut)內地擁有權，即由特許經營者升級為品牌全資擁有人，未來唔需要再畀特許經營費母公司，不過，百勝中國股價今日(17日)幾乎一跌到尾，午後一度跌3%，低見334元，點睇呢單Deal？
元宇證券投資總監林嘉麒指，兩家公司有控股關係，未來要睇百勝中國擁有咗呢個品牌後，係咪會做得更好，又或者過往畀母企嘅固定費用係咪可以回本，以及提升品牌價值，佢認為，無論間接定直接收購，最重要都係未來嘅經營表現。
KK又話，今次百勝中國買嘅收購價未必好吸引，但現時內地經濟情況一般，估值方面會有啲優勢，但當內地經濟好轉，或餐飲業併購活動變得頻繁，到時商譽價值會再提升。佢認為，今次百勝中國收購時機唔錯，但出價唔太合理，長線會有著數，但短線優勢就唔係咁大。
