【Now財經台】油價本周累跌逾4%，氣油價格更大跌7%，成為表現最差商品，美國總統特朗普(Donald Trump)放風，聲稱周末將會同伊朗簽和平協議，如果今次真係成事，倫敦布蘭特期油會落到咩水平？
外匯策略專家張建泰指，之前一次又一次聲稱好快傾掂數，最後又係另一回事，所以市場依家對佢嘅言論反應都唔大，傾向先睇定啲，現時市場都用較質疑嘅態度去看待美伊達成協議，加上協議涉及更多附帶條件，例如濃縮鈾、解凍資金等，成事難度愈來愈高。
Ken又指，市場開始擔心油價企喺高位咁耐，會影響全球經濟及令石油需求減少，令油價唔可以好似以前咁爆上去，加上已討論用其他替代路線或油管等，減少對霍爾木茲海峽(Strait of Hormuz)嘅依賴，令油價短期上升機會進一步減少，所以油價短期會睇跌，小心有機會下試每桶80美元水平。
