【now.com財經】噚日揀咗隻恒指牛(58230)出嚟，講到明都只係爬住格仔啫，用小時圖10線做上望目標。還好指數上得到，比到個食餬位出嚟，皆因以收市價計，指數係重新低走於小時圖10線。
美以伊戰爭再度重燃...其實好似都無停過，而6月初喺日線圖上見100/150線出阻力+「身懷六甲」喺線前出現，恒指Put喺呢度都有揀到嘅，只不過唔知大家仲有無揸到呢依家呢一刻啫。
今日再睇個日線圖，整條保歷加通道保持向下而指數亦都貼住底線向下落，而今日嘅100線同150線都愈來愈近，兩者只係爭13點，隨時明日或之前應該會見到100線低走於 150線，再出多個「死亡交叉」之餘，更重要嘅係五條平均線(10/20/50/100/150線)倒序排列，屬中線利淡癖訊號。
至於條250天線 aka 牛熊分界線，今日已經高走於50天，即係佢今日同50線出咗「死亡交叉」；同100線位都仲爭331點，即係話如果日線圖上再出多次「死亡交叉」嘅話，呢個就係傳說中嘅「終極死亡交叉」。
再拎埋個牛熊證街貨圖出嚟，見今日牛證有儲住過千張期指街貨嘅已經有三層，喺240至242嘅範圍。而由於日線圖下方都無晒平均線，得返條保歷加底線，所以唯有向前追索返啲低位嚟拉線，先於3月下旬有一個24,409點嘅低位；再向前見3月中左右嘅低位24,203點，而24,203點亦都係暫時今年嘅低位，剛好亦都係牛證嘅重貨區。
恒指熊(55595)，收回價24,962點，同現價有約513點距離，已經係市場上最貼價嘅熊證，而(55595)則為當中最高槓桿，有約38.8倍，今日先上市所以未見街貨。
依家10點10分，五分鐘圖上見整整條保歷加都向下行，指數同Slow STC(14.3)都有隨時出觸底上行嘅可能，所以依家硬出有啲難，不如等指數喺五分鐘圖上見反抽上10/20線唔過時先至出隻(55595)；甚至用返Slow STC(14.3)上到超買位後見觸頂向下先至出都可以，睇吓港股有無本事喺隔離創完新高之後，佢走嚟創年內新低。
作者阿珊，以技術分析玩輪證，唔貪心，努力賺取我家肥貓罐罐ฅ^•ﻌ•^ฅ。
想睇埋美日台股、金油匯幣ETF嘅玩法，請往Patreon搜尋「cbbcwar」；新書《風暴中的小資理財聖經》已於Google Book Store上架，可免費試閱。
