【Now財經台】停牌逾1個月嘅康特隆(01912)今日(9日)復牌，股價一度狂飆逾1.9倍，集團宣布向認購人Zhuang Hezhong按每股0.365元配售新股，佔擴大後發股本58.81%，另向最少6名投資者配售12.61%股份，合共集資1.2億元，雖然配售價較停牌前折讓達35%，但市場今日反應好好，後市應該點部署？
天風國際李偉傑指，今次注資最少可以幫公司解困，過去半年，公司傳出嘅消息大部分都唔太正面，喺經營出現困難下，唔使對今次配股嘅折讓幅度太緊張，依家新主連同其他股東合共持股逾70%，股權易手後，可以留意公司會唔會有新營運模式。
至於還債後業務會唔會有轉機，Jason就話，公司轉型需時，但相信還債後餘下嘅3000萬元資金，足以支持公司待變，市場亦關注康特隆可唔可以利用新大股東，喺內地及亞洲嘅消費電子買賣、半導體出口貿易嘅人脈網絡，讓康特隆切入近期熱炒嘅板塊。
不過，佢提醒，股份今日暴升後，理論上會出現小陰燭，股價會慢慢返落嚟，可以留意公司會唔會拓展新業務，例如人工智能(AI)領域，又建議投資者唔使喺現價高追。
