【Now財經台】有分析指，市場資金轉炒金融股，不過，黑石集團(Blackstone)今日(5日)再爆私募信貸贖回潮，引起市場憂慮。此外，有信貸市場調查結果顯示，爆發私募信貸危機嘅機會約17%，但值得留意係，信貸市場業界似乎擔心滯脹(Stagflation)多過私募信貸危機，但又見到資金不斷喺私募信貸贖回，點分析依家嘅情況？
信誠證券及期貨投資服務部董事蕭猷華指，暫時睇嚟，爆發私募信貸危機嘅風險唔高，機率僅17%，反而擔心出現滯脹嘅比率達34%，主要係滯脹帶嚟嘅影響係一環扣一環，一旦出現滯脹，意味通脹會升溫，經濟增長就會下滑，到時私募信貸贖回潮會更嚴重，因此，市場之後要留意影響滯脹嘅因素，例如通脹及油價等。
油價方面，Tony續指，市場之前擔心曼德海峽(Bab-el-Mandeb)會被封鎖，導致出現滯脹，以及令贖回潮加劇，不過，睇返依家嘅情況，其實唔需要太擔心。
