【Now財經台】市建局上周就紅磡庇利街/浙江街項目，邀請發展商提交合作發展意向書，將會喺下周三(27日)中午截收，係一幅土瓜灣臨海地皮，地盤面積逾81000平方呎，預期最少可以興建1200個住宅單位，點睇招收意向反應及地皮估值？
美聯測量師行董事林子彬估計，呢個臨海項目應該幾受歡迎，因為條件唔錯，而同區嘅市建局項目銷情都理想，加上附近有港鐵站，可以接駁到屯馬線，交通都算方便。
佢又指出，地皮總估值約55億元，屬於中大型項目，而向海單位或可帶動售價，但整體嚟講，預期發展商會偏向大眾化市場，估計單位平均實用面積約400平方呎，1房、2房及細3房戶型會係主打，現時附近新盤呎價介乎約20000元至22000元，相信發展商都會參考呢個呎價去做部署。
