【Now財經台】名創優品(09896)今日(13日)中午發盈喜，預告收入按年最多增長29%至57.8億人仔，經調整淨利潤料按年增長10%，股價午後一度衝高近5%，高見29.06元，點睇今次嘅盈喜？
元宇證券投資總監林嘉麒指，其實係基數問題，加上市場都可能會睇返基本淨利潤情況，要求會較高，所以嚴格嚟講，如果要逐個數睇，今次未必係投資者心目中嘅盈喜，雖然細數未必符合市場期望，整體盈喜表現令市場失望，但之後正式業績報告，或再之後業績有改善，可以再返轉頭睇呢次盈喜。
名創旗下品牌TOP TOY收購永輝超市錄得投資虧損，而TOP TOY喺3月底再交港股IPO申請，如果成功上市可以沖喜下，還是呢個預期已反映晒？
KK又話，呢個預期仍未完全反映，之前收購永輝市場覺得用咗一筆錢，但最後又蝕，不過，永輝同名創亦可能會出現協同效應，分店數量、經營線下業務有關聯，可以提升返公司價值，但需要不斷有好消息又持續反酵，相信名創短線仍有上升空間。
