【Now財經台】京西國際(02339)今日(11日)復牌，股價一度狂飆逾80%，有消息指，控股股東京西智行同喺深圳上市嘅立訊精密達成協議，立訊有條件同意收購京西智行全部股權，係咪因為呢個憧憬炒起股價？
《香港股票財技密碼》作者梁杰文表示，相信高追嘅投資者主要係睇中立訊強大背景，依家集團喺A股市值約5000億元人仔，規模係京西國際50倍，若後續有資產整合或注資行動，將會為京西國際帶嚟巨大發展空間，令市場有好大憧憬。
Mike又話，立訊規模龐大兼業務多元化，再多一兩個上市平台唔算多，唔少大型企業旗下都有3至4家上市子公司，以分散唔同業務，其實立訊已經唔係第1次入股香港上市公司，例如2022年入主匯聚科技(01729)，公司股價近年節節上升，反映立訊投資眼光好，有成功前科下，自然尋求再下一城。
佢續指，京西國際每年營業額介乎約20億至30億元，唔係一家空殼公司，錄得虧損喺立訊眼中可能只係經營不善或業務定位唔清晰，又相信立訊絕對有能力令京西國際業績扭虧為盈。
