【Now財經台】正當市場憧憬美伊戰事有望停火之際，最新突然傳嚟美伊再度交火嘅消息，國際油價就繼續高企，)紐約期油喺今日(8日)亞洲交易時段一度見每桶95.82美元，倫敦布蘭特期油就見101.51美元，油價急升唔少航空公司多次加燃油附加費，甚至愈加愈多，短途加500元，長途更去到2000元。高油價對旅行社經營帶嚟幾大影響？
東瀛遊(06882)主席禤國全指，以上月復活節假期為例，旅遊需求仍然理想，由於長線團大減，所以旅行團基本上集中喺亞洲，依家有40%客人會去內地玩，40%就揀日本，餘下20%就去東南亞國家。
Steven表示，其實高油價唔太影響旅行社營運，因為旅行社只係代航空公司收燃油附加費，唔係旅行社本身嘅收入，客人都明白加燃油費其實同旅行社冇關。
禤國全又稱，以暑假日本團為例，雖然客人要畀500元燃油附加費，可能都有啲唔開心，但因為日圓一直都處於低位，所以唔會影響佢哋嘅旅遊意欲，相反，長途機燃油附加費加幅較大，難免對歐洲團有一定影響。
