【Now財經台】有「小非農」之稱嘅美國ADP就業數據昨晚(6日)出爐，4月私人職位增加10.9萬份，略少過預期，但係去年1月以嚟最多，ADP私人職位增速再度加快，係咪反映美伊戰事對美國經濟影響唔大？對美息有冇影響？
資深經濟分析師羅家聰指，美國經濟好景時，ADP私人職位可以去到約20萬份，所以4月有逾10萬份都唔算多，加上ADP數字有時同政府數據有頗大出入，詳細要睇返明日(8日)勞工部公布嘅官方數據，但佢認為，現時美國就業市場情況唔理想。
KC又指，據美國聯儲局點陣圖(dot plot)顯示，仍呈減息趨勢，而新主席沃什(Kevin Warsh)亦似乎係鴿派，另外，期貨、利率和債息短線被油價夾高，推高通脹預期，不過，如果將債息拉長睇，10年期債息走勢穩定。
KC補充， 除人工智能(AI)領域，美國經濟增速唔算快，所以整體通脹未有明顯升溫，加上依家經常提及AI會取代人類，會進一步壓低通脹。不過，油價喺戰後急升，令唔少生產活動陷入停頓，對經濟造成壓力，都令減息機會增加。
