【Now財經台】藥明康德(02359)昨日(27日)收市後出咗季績，上季盈利及收入按年增長逾20%，股價今日(28日)高開8%後，升幅一度擴大至逾17%，高見148元。摩根士丹利指，藥明康德預測市盈率(PE)約19倍，又認為估值唔貴，可以現價買入，股價仲有幾多上望空間？
元宇證券大中華區股票投資總監趙晞文指，假設盈利預測不變，過去幾年，藥明康德估值最受壓時，可以去到22至23倍，如果PE由19倍升至22倍，股價仍有約10%潛在升幅，值得留意係，如果管理層上調今年指引，包括每股盈利及收入預測，加上毛利率擴張，帶動每股盈利進一步上調，就可以推高估值。
KK又認為，藥明康德估值短線最多睇22至23倍，若整體業績上調，PE可以去到25倍，值得留意係，疫情期間預測PE高達30倍，對應當時收入及盈利增長20%，估值尚算合理，從呢個角度睇，佢認為藥明康德係行業龍頭，有參考性指標，因此，做中短線或長線部署都可以。
