【Now財經台】油價扭轉上周五(24日)跌勢，倫敦布蘭特期油及紐約期油喺今日(27日)亞洲交易時段，一度升約2%，高盛今日(27日)上調布油今年第4季預測，由每桶80美元調高至90美元，但由於波斯灣地區原油日產量減少1450萬桶，令全球原油庫存以每日1100萬至1200萬桶速度減少，油價暫時係咪易升難跌？
ATFX亞太區首席分析師林銘添指，美伊戰局仍然不明朗，加上霍爾木茲海峽(Strait of Hormuz)仍然封閉，導致原油供應減少，影響油價走勢，雖然有消息指，俄羅斯及中國會為其他國家供應原油，不過，霍爾木茲海峽一日唔開放，油價都會企喺75美元至80美元樓上。
佢又話，就算海峽解封，其他原油供應都需時調節，因此，油價都會維持喺偏高水平，短期而言，相信100美元至110美元水平會有阻力，但海峽開放後，估計油價會落返60美元至70美元水平。
