【Now財經台】地緣政局持續緊張，市場十分關注航運業表現，其中，太平洋航運(02343)昨日(16日)出咗首季營運數據，隨即獲大行上調目標價，太航股價今日(17日)逆市造好，一度飆逾8%，高見3.18元。
睇返第1季數據，小靈便型船日均收入按年增長10.8%，較基準運費大升76%，超靈便型船日均收入按年升14.4%，較基準運費飆1.1倍，不過，大行認為，小靈便型船好較好，而公司昨日宣布取消去年底訂立的超大靈便型新船定單，改為買多兩艘小靈便型船，小靈便型船前景係咪真係好啲？
王道資本及家族資產管理執行董事黃敏碩認為，主要係小靈便型船靈活性更大，而相對大型船，小靈便型船彈性亦更高，去其他海峽或穿州過省都會更方便。
Michael坦言，喺大行嘅角度，係會考慮得更深入，雖然兩類船收入差唔多，但船隻大小都會影響成本消耗量，轉用小靈便型船就可以降低成本，Michael認為，太航今次調整定單一定對公司營運有幫助。
