【Now財經台】泡泡瑪特(POP MART)(09992)股價暫時已連升第3日，今日(15日)一度再升4%，高見164.2元，不過「盲盒經濟」明顯降溫，盈利爆發期亦暫告一段落，睇返《彭博》數據，泡泡瑪特預測市盈率(PE)約12.4倍，對比環球IP同業唔算高，係咪因為太依賴Labubu？依家又值唔值得入手？
復星財富控股投資經理李曉翀指，依家泡泡瑪特嘅估值比較適合做中長線部署，始終集團對Labubu依賴度高，而其他IP都上緊嚟，加上其他主題性投資已炒到好貴，如果用呢個估值去憧憬未來幾年增長完全唔貴，依家反而可以用呢個比較平嘅估值，去配置未來增長。
Andrew又話，成個IP市場推出好成功，線下實體店實現強勁人流，而美國市場睇得咁悲觀，係因為美國線下店舖擴張需要較多人手快速回補，同埋需要更多線下店員之間互動、提供情緒價值，從而帶動呢類產品銷售，雖然線上店有銷售，但效果唔明顯，喺新消費市場環境下，情緒價值行得比較前，亦可提升購買力。
