【Now財經台】寧德時代(03750)計劃「抽水」籌約390億元，股價昨日(13日)破頂，一度突破700元關口，股價今朝(14日)輕微低開後，跌幅一度擴大至逾7%，落到20天線水平，吸唔吸引到好友入場？
中信證券國際股權衍生品銷售經理李碧珊指，雖然寧德時代股價強勢，但資金流一向較靜，今朝見到資金趁股價調整流入好倉，但熱門條款方面，街貨量其實唔多，最高嘅產品都只係約10%。
Percy又話，現時熱門CALL主要分兩批，進取少少有行使價較高，大約900元至1000元，今年9月到期，槓桿做到6倍至7倍，另一批就睇中線，主要擔心短線會再有配股集資消息拖累股價，所以選擇保守啲嘅條款，傾向選擇價內或貼價CALL，年期長至下年4月都有，槓桿3倍至4倍。
牛證方面，佢補充，最貼價嘅收回價喺600元附近，槓桿高達13至14倍，但始終股價跌緊，價外幅度約5%至6%，投資者要留意隔晚有機會有收回風險。
