【Now財經台】繼美國銀行股後，科技股會接力派成績表，市場對硬件企業嘅業績有頗大期望，點預測美國科技股業績？此外，全球NAND快閃記憶體企業SanDisk晉身納指100，將會喺下周生效，刺激股價昨晚(13日)飆逾10%，今年以嚟已累升約3倍，仲值唔值得高追？
高富金融集團投資總監梁偉民估計，硬件股業績會繼續造好，因為科技巨企不斷發展人工智能(AI)，令硬件需求維持熾熱，出現供應緊張嘅情況，令呢啲公司有主導價格嘅本錢，繼而大幅推高毛利率。至於記憶體板塊，受惠於供不應求，價格大幅飆升，相信都可以交出靚業績，甚至高過市場預期。
不過，Wyman提醒，呢啲股份嘅股價已經升唔少，要留意股價到底反映咗幾多盈利增長，雖然供不應求嘅周期或維持1至2年，但如果年底至明年初供應增加，屆時股價有機會回落，建議投資者以短期操作為主。
佢又話，好難估計SanDisk股價幾時見頂，始終業績仍然強勁，上季盈利較預期高出70%，市場預期，集團今、明兩年盈利將持續增長，現時預測市盈率(PE)約20倍，明年都有約10倍，所以SanDisk短期仍有炒作空間。
