【Now財經台】九毛九(09922)上周五(10日)出咗季度數據，其中，旗下自營店太二翻枱率每日3.5次，人均消費保持74元人仔，表現較慫火鍋及九毛九西北菜有改善。九毛九股價今日(13日)下晝逆市彈高，一度升3.7%，高見1.94元，九毛九上季嘅好表現，可唔可以延續落去?
高歌證券金融首席分析師聶振邦認為，九毛九第1及第2季業績造好，主要受新年及黃金周帶動，加上內地通脹數據逐步上升，反映居民消費意欲增加，飲食業都可以受惠。佢又提及，公司去年整體收入主要由收入佔比逾70%嘅太二帶動，因此，市場對集團整體表現都睇得比較樂觀。
聶Sir又話，太二主打酸菜魚，而唔係火鍋店呢類客人逗留時間較長嘅餐廳，因此，日均翻枱率有逾3次，同店銷售壓力細過慫火鍋及九毛九西北菜，佢估計，集團未來會力谷太二，以提升業務收入及盈利增長。
