【Now財經台】美伊雙方官員喺巴基斯坦結束歷時21小時嘅談判，最終空手而回，美國總統特朗普(Donald Trump)宣布，將會喺美國東岸時間今日(13日)上午10點起，美軍會封鎖霍爾木茲海峽(Strait of Hormuz)，並會喺國際水域搜尋及攔截向伊朗繳交「買路錢」嘅船隻。消息刺激油價再度急升，紐約期油及倫敦布蘭特期油一度迫近每桶105美元及102美元，點睇對股市嘅影響？
星展銀行(香港)豐盛私人客戶執行董事鄧威信認為，油價長期高企一定會影響通脹，繼而影響市場對美國聯儲局嘅減息預期。佢又指，依家市場反映央行有機會掉頭加息，一旦加息勢推高生產成本，繼而損害企業盈利，導致市場減少投資，進一步不利就業市場，令美國經濟陷入衰退周期。
Wilson又話，油價再度急升必定影響股市，尤其美債孳息率不斷扯高，引導唔少資金由股市流向債市。佢建議，投資者應重新平衡投資組合，可以部署較多安全性高嘅債券，以及派息率高兼穩陣嘅股票，例如必須消費品類及能源股，以應對市場波動。
