【Now財經台】截至早上11時止，1小時內《彭博》用戶搜尋量最多港股，依次為舜宇光學(02382)、遠東發展(00035)、小米集團(01810)、智譜(02513)及泡泡瑪特(09992)。
智譜股價喺業績後狂飆逾30%，今日(2日)出現回套，一度瀉逾16%，低見764元，公司發布咗面向視覺編程打造嘅多模態Coding基座模型GLM-5V-Turbo，可以結合唔同人工智能代理(AI Agent)協作，但股價仍要插水，投資者應唔應該趁股價急回吸納？
香港股票分析師協會副主席曾永堅認為，由於市場睇好內地AI應用嘅持續增長能力，尤其係業績反映業務增長潛力大，加上有國際化前景，令智譜喺過去2至3星期一直受資金追捧，但佢提醒，智譜估值及股價喺上市後已累積唔少升幅，所以出現技術回調係好正常。
Jaseper相信，喺貨源歸邊、企業成本低及AI未來變現能力高，呢3大利好因素支持下，智譜短期仍會繼續有炒作，只要股價守得住760元水平，投資者仍可以考慮做短線部署，甚至即日鮮。
