【Now財經台】三花智控(02050)昨晚(23日)出咗業績，去年收入按年增長10%至310億人仔，純利按年增長31%至40.6億人仔，符合預期，但點解股價今日(24日)冇跟大市反彈，僅反覆靠穩，睇返依家內地經濟及內需情況，集團兩大業務，即製冷空調電器零部件及汽車零部件，係咪好難有顯著增長？
元宇證券大中華區股票投資總監趙晞文指，三花智控業績同市場預期冇太大落差，但單睇去年第4季，業績唔係太理想的確令人意外，佢又指，隨著削減補貼，新能源車銷情降溫，業績自然難有驚喜，所以股價冇乜反應都係正常。
佢續指，製冷相關部件需求增速開始慢慢回落至正常水平，而過去幾年都係靠家電補貼政策推高定單，依家補貼少咗，三花智控收入仍維持到高單位數至低雙位數增長已經唔錯。
汽車零件方面，晞文就話，新能源車市場「內捲」嚴重，市場對上遊汽車零件生產商議價能力有顧慮，擔心影響毛利率，雖然之前因炒作機械人概念，三花智控股價一度被推高，但今次業績對呢瓣業務著墨好少，所以推動唔到股價。
