【Now財經台】美國總統特朗普(Donald Trump)嘅「48小時重開海峽死線」正在倒數，IEA就警告全球面臨嚴重能源危機，伊朗亦開出停火條件，但等同要美軍投降，戰事似乎來到關鍵時刻，國際金價反而向下，最新失守每盎司4400美元，全年目標係咪要下調？依家係咪入市嘅好時機？
上海商業銀行研究部主管林俊泓指，繼續維持金價年底見4000美元至4200美元嘅預測，黃金唔係避險嘅唯一選擇，睇返過往歷史，打仗時金價表現都未必次次都一枝獨秀。
佢續指，今次中東開戰初期，市場擔心地緣政治因素，所以會選擇黃金避險，但由於金價之前升得太急，遠高於200天線，所以存在一定調整壓力，依家回調至4000美元水平，反而更接近均值。
Ryan又話，當金價從高位回調20%至30%，相信會有央行出手增持黃金，以達到多元化外匯資產，估計金價不至於跌至3500美元水平，並估計回調後仍有購買力入市。
佢認為，手上完全沒有黃金嘅投資者，如果金價回落至4000美元水平，可以考慮多元化配置。
