【Now財經台】小米集團(01810)發布最新人工智能(AI)大模型小米Mimo-V2-Pro，專為現實世界中高強度人工智能代理(AI Agent)場景度身訂造，小米股價今日逆市大升近6%，高見37.18元，呢個新AI大模型係咪真係咁吸引？股價今日炒高係咪同Mimo-V2-Pro有關？
耀才證券研究部總監植耀輝指，依家每家大型科技公司都會推出新大模型，按道理會愈來愈比對手優勝，一般正常情況下，愈遲推出嘅大模型表現愈好，不過，呢個大模型優勢及表現可以維持幾耐，之後會唔會有更多嘅升級版出現，呢啲都要繼續觀察。
Stanley又話，小米股價之前已經跌咗唔少，當集團有正面消息出現時，股價有返少少好表現都係正常，今日除咗發布大模型外，亦撞正小米汽車發布新一代SU7，喺呢兩個市場關注及矚目嘅消息同時出爐下，加上市況比較差，資金都偏向追捧一啲有利好消息嘅股份，喺多項因素支持下，就推高咗小米股價。
