【Now財經台】近期中東霍爾木茲海峽(Strait of Hormuz)被封鎖，除咗油氣出口受阻，亦係化肥及工業原材料嘅運輸要塞，受供應短缺擔憂刺激，化肥股如中化化肥(00297)同埋中國心連心化肥(01866)股價一度走強，睇唔睇好呢類股份後市？
富途證券首席分析師譚智樂指，近期化肥股走勢雖然偏強，但今日(13日)出現衝高回落，反映市場進入好淡爭持嘅尷尬局面，Arnold話，原油價格上升對化肥的確存在成本壓力，不過目前油價急升被視為短暫嘅地緣政治因素，而且企業手頭上有足夠庫存應對，短期內反而有藉口加價，將成本轉嫁。
但佢補充，之前嘅升浪可能只係圍繞國內刺激內需同農業嘅政策憧憬，而行業估值本身就偏低，所以有較多資金留意，但若戰事持續、油價繼續升高，企業或需面對產品短缺風險，對整體需求和市場情緒都會轉向負面。
Arnold建議，短線投資者要小心，若依家高位追入，可能要面對5%至6%嘅回調風險，而對於長線投資者嚟講，如果目標係追求高息，化肥股仍具備條件，因為短期盈利波動對派息層面的衝擊相對有限。
