【Now財經台】國際油價衝破每桶100美元，市場憂慮情況持續會推高通脹，不過，美國3月非農就業職位爆冷大減9.2萬個，失業率更升至4.4%，數據出爐後，美國2年期國債息率回落，但由於通脹壓力及滯脹(Stagflation)憂慮升溫，10年及30年債息持續向上，美國係咪面臨滯脹風險？邊類資產表現會較好？
獨立市場策略師何啟聰指，雖然數據睇到美國有輕微滯脹風險，但亦唔需要太悲觀，佢估計，美以伊戰事以月計嘅機會，大過以年計，加上美國11月進行中期選舉，一旦戰事持續會拖累經濟及股市，到時共和黨好大機會輸咗中期選舉，所以總統特朗普(Donald Trump)必須處理。
Ivan又話，過去2個月嘅數據或呈現滯脹風險，但只要停戰，到時油價回落，通脹亦會降溫，就業市場可能會更差，估計到時聯儲局會因就業數據唔理想，加快減息步伐及加大力度。
佢補充，散戶可以留意黃金、高息股及必需品，現時金價仍企喺每盎司5000美元樓上，戰事過後表現可能更好，而高息股及必需品相關股份，呢類企業盈利能見度高，較少受戰爭直接影響，表現相對穩定。
