【now.com財經】港人最喜愛食肆之一，分店成日大排長龍嘅日本連鎖壽司店壽司郎(SUSHIRO)，北京一家分店爆出食安風波，當地市場監管部門已立案調查。
事緣日前有消費者喺網上出Po，聲稱喺北京一家壽司郎分店食嘢時，發現吞拿魚壽司上有疑似寄生蟲卵嘅白色異物，當地市場監管部門指，高度關注事件，並已立案調查。
據《南方都市報》引述壽司郎指，集團仍喺度確認緊涉事異物係咪寄生蟲卵。
雖然事件仍調查緊，但喺日本上市嘅壽司郎母公司Food & Life Companies，股價應聲急瀉，一度重挫14%，錄得逾3個月以來最大跌幅。
