【Now財經台】相隔近8年，恒生銀行再推出定息按揭計劃，首3年定息2.73厘，較依家嘅實際按息3.25厘，低約0.5厘，如果買家揀定按計劃，每月供樓負擔就會細咗，喺呢個情況下，係咪會更多人選擇定按？
中原按揭董事總經理王美鳳表示，之前只有1家大型銀行提供定按計劃，以該行數字推算，揀定按嘅比例約30%，定按吸引之處除咗息率低過H按，回贈及優惠都同H按差唔多。
不過，市場上仍較多人揀H按，主要係H按屬於浮息計劃，當拆息跌到某個水平，H按嘅實際按息就有機會低過定按。
至於拆息走向，王美鳳指出，若美國聯儲局繼續減息，拆息有機會跟隨回落，但定按息率本身已較低，1個月拆息要低過1.43厘，H按實際息率先會低過定按，佢又估計，1個月拆息要跌穿1.43厘仍然需時。
