【Now財經台】美以持續空襲伊朗，伊朗亦有反擊行動，令中東緊張局勢不斷升溫。美國總統特朗普(Donald Trump)日前預告，針對伊朗嘅軍事行動或持續約4周，依家市場點評估事態發展？
星漢資產管理行政總裁王榮昆指，睇返美股及歐股昨晚(2日)表現，市場未有出現任何避險傾向，主要係美國喺開戰前已作出預告，大部分投資者喺戰事爆發前，其實已做好風險投資轉移準備，加上參考返歷史事件，雖然呢類地緣政治風波短期會為市場造成一定波動，但中長線影響唔大。
對於戰事後續發展，James認為，戰事要喺4周內結束嘅機會唔大，按照依家市場嘅預測，戰事好大機會喺6月底結束。佢又話，雖然呢場戰事或對市場造成短期波動，但現時真正主導及困擾市場嘅主軸，仍然係人工智能(AI)嘅發展，市場焦點將落喺呢條主線可以持續幾耐。
