【Now財經台】回顧之前4個馬年，恒生指數3升1跌，今日(20日)係港股馬年首個交易日，據中信里昂風水指數預測，港股喺馬年會呈先低後高格局，3月將會見今年低位，但4月開始就會逐步回升，下半年走勢就會呈「進兩步，退一步」格局，去到年尾更會破頂。
鴻鵠資產管理行政總裁陸庭龍睇法就唔同，佢認為港股喺馬年會先高後低，恒指上半年將會畀人工智能(AI)企業推高。此外，美國聯儲局新主席5月就會上任，外界相信由美國總統特朗普(Donald Trump)提名嘅沃什(Kevin Warsh)，佢嘅鷹派作風會令美元走強，美伊關係持續緊張，市傳伊朗擁有核武，相信特朗普會更審慎行事，但下半年局勢或會惡化，繼而拖累美股。
